حــتــى الــنــامــوس بــالـــلـــيــــــزر

طور علماء أمريكيون بندقية ليزر قادرة على القضاء على ملايين البعوض خلال دقائق ... في اختراق علمي قد يساهم في مكافحة الملاريا ... التي تفتك بطفل كل 30 ثانية حول العالم. وينطلق الليزر بمجرد رصد الذبذبات الصوتية التي يصدرها البعوض بضرب جناحيه أثناء التحليق ...  ويفتك به على الفور...إختراع كبير فعلا و طفرة علمية رهيبة تفيد الإنسان خاصة الأطفال اللى نسبة إصابتهم بالملاريا كبيرة أكتر من اللازم  و طبعا لازم تنشن على البعوضاية بالظبط و على بال ما تخلى شعاع البصر يمر من فتحة الشيز من سن نملة الدبانة أسفل منتصف الهدف اللى هوة الناموسة تكون الملاريا وصلت جسمك و الفاتحة على روحك مقدما .. ربنا يحفظكم . أنا باهزر طبعا لكن إحنا عايزين ليزر يقضى على الرشاوى و على الكوسة و يدمر الواسطة و الفساد .. يفتك بالمرض الجهل و الفقر... و ينهى الإحتكار و يخفض الأسعار... عايزين ليزر يحقق الأمان و الإستقرار و يزود الإنتاج ويحقق الحرية  

أســفـــلــــت زى الإزاز

دفعت ظاهرة بصق "العلكة" في الشوارع شاب ألماني إلى تخصيص مشروع التخرج عن كيفية مواجهة هذه الظاهرة .... حيث تتكلف مدن مثل كولون وميونيخ وغيرهما أكثر من مليون يورو لازالة بقع العلكة من الشوارع .... وتحتاج "اللصقة" التي تتركها "العلكة" إلى 5 سنوات كاملة لكي تزول تلقائيا من الأرصفة وأرضيات الشوارع والساحات.

الحمد لله أنا مش من ألمانيا عشان ما أشوفش المنظر السخيف دة يعنى إيه مستيكة تترمى فى الأرض أو على الرصفان الحمد لله ان أنا فى مصر باشوف بس السجاير و المناديل و باشوف الكياس و التراب و باشوف الطوب و الزلط  ...لكن شهادة لله ما شوفتش مستيكة أبدا عشان الناس اللى بتقول ان فى مصر كل حاجة وحشة لأ .. أهو فى ألمانيا الناس بترمى مستيكة على الأرض و بتكلف مليون يورو و فى مدينة واحدة بس .. هى الناس دى مش مخلية حاجة إلا و حاسباها حا تكلف كام و حا تصرف كام .. لأ و عايزين الأرض اللى هية الأسفلت زى الإزاز بيبرق و مزألط و مزأطط .. جتنا نيلة فى حظنا الأسفلت  قصدى حظنا  الهباب 

الـــفــرح كــبـــيـــر و الــعــروســـيـــن ضــفـــــادع

قام سكان إحدى القرى في الهند بإجراء طقوس تزويج ضفدعين ... إسترضاءا لآلهة المطر كي تنزل عليهم الماء بعد موجة الجفاف التي ضربت مناطقهم ...  وساهمت كل عائلة في القرية بمبلغ صغير من المال من أجل دفع تكاليف حفل الزواج ... ويلجأ الأهالي إلى هذه الطريقة عند الجفاف ... حيث يعتقد الأهالي أن الضفادع تتحدث مع آلهة المطر وتستعطفها كي تنزل المطر وقت الجفاف ... أنا سعيد بالتكافل اللى بين أهل القرية حتى لو كان فى جواز عريس و عروسة من إخوتنا فى الإنسانية الضفادع ... و قال إيه إسترضاء لآلهة المطر .. إسترضاء إيه و قرف إيه . و كفر إيه .. و إله إيه دة اللى بيسترضى بالضفادع .. أنا عارف إله بيسترضى بحبة رز و حتة فرخة .. و إله تانى بيسترضى بحلة مكرونة و حتتين بانيه .. لكن إله بيسترضى بضفادع ماشوفتش أبدا ....  و برضه معرفتش إن الإله دة رضى بالضفادع و نزل المطر و اللا لأ ..

بــلاش لـــحــمــــة لــمـصلـــحــتــــكـــــم

حذرت دراسة حديثة من أن الإكثار من تناول اللحوم الحمراء قد يزيد إحتمال الإصابة بالعمى بمعدل النصف .... وتوصل الباحثين في مستشفى فيكتوريا للعيون والآذان بأستراليا  إلى هذه النتيجة بعد الإطلاع على العادات الغذائية لحوالي 7 آلاف شخصاً تتراوح أعمارهم ما بين 58 و69 سنة في ملبورن ....أنا سعيد جدا بالإحصائية دى اللى فى أستراليا بلد اللحمة و الثروة الحيوانية العملاقة ... قلت الحمد لله لأن الواحد فى مصر بيصاب بالعمى من النظر إلى أسعار اللحمة الحمرة مش من أكلها ...  واللى حا ينظر إلى اللحمة المستوية حايجيله عمى فورى كلى مش نصفى .. و لذلك أنا بانصح الناس إنهم ينسوا أكل اللحمة و النظر إليها بإعتبارها رجس يجب إجتنابه و البص عليه و التفكير فيه و إنك حاتاخد ثواب لما تقول للناس على الخير دة و هوة إجتناب اللحمة الحمرة .... و إحتياطا كمان اللحمة البيضة و اللحمة البنفسجى ...  و كفاية علينا الفول و العدس رغم الزغللة اللى بنحس بيها لما بنشوف سعرها 

الـــصـــلــح خـــيـــر يا جـــمـــاعـــة !!!

حقق كوريان جنوبيان مسنان ... أحدهما الزوج في ال 94 والزوجة في ال83، رقماً قياسياً وأصبحا أكبر شخصين يرفعان دعوى طلاق في البلاد ، وتقول الزوجة المسنة انها تعرضت للإذلال على يد أولاد زوجها الستة ... لكن الزوج يزعم ان زواجهما تفكك بسبب علاقة غرامية تربط زوجته برجل آخر في وقت سابق من هذا العقد حتى إنها سافرت إلى هاواي برفقته.

معلش يا ناس حد ابن حلال يتدخل و يوفق بين الزوجين قبل ما يتوفوا و يروحوا لربنا و همة مطلقين و باقول للزوجة أم 83 سنة تعالى على نفسك شوية جوزك كبير و عنده 94 سنة أحسن يروح منك فى شربة مية و هوة فى ريعان الشيخوخة .. و انت كمان يا راجل إزاى تشك فى شريكة كل حاجة فيك انها ماشية مع واحد تانى أصغر منك بعشر سنين كاملة يعنى عنده 84 سنة و إزاى ما حسيتش انها مش موجودة عندك فى البيت عشرة ايام كاملة ربنا يكون فى عونك و يديك الصحة .. آخر حاجة حا قولهالكم .. الصلح خير و انتوا مالكوش غير بعض  

جـــدة لـــذيـــذة

نجحت بام ديكسون وهي جدة (55 عامًا) في أن تصبح أكبر شخص يعبر سباحة مضيق كوك الذي يمتد لمسافة 26 كيلومترًا بين الجزيرتين الشمالية والجنوبية في نيوزيلندا. وأكملت ديكسون العبورفي زمن بلغ 9 ساعات و23 دقيقة. وقال مرشدها,سباح المضيق المخضرم فيليب روش إن بام ديكسون أخصائية العلاج بالتدليك وعداءة الماراثون بذلت "جهدا كبيرا" في أول محاولة لها لعبور المضيق المعروف بصعوبة السباحة به خاصة خلال الرياح القوية التي جعلت الظروف صعبة بالنسبة لها ولطاقم الدعم المرافق لها.

برافو يا تيتة يا ست الحبايب يا حبيبة .. برافو... و فعلا درس فى قوة العزيمة و قوة الإرادة   ... اللى زيها فى بلادنا العربية قاعد فى السرير بيتلقى العلاج من الضغط و السكر لكن بسلامتها  بتعبر سباحة 26 كيلو يعنى من المنشية الى أبى قير و كمان فى زمن 9 ساعات فقط .. طبعا ما همة بلد البقر الفريزيان العملاق ... و الزبدة النيوزيلاندية الصفرا و بلد المساحات الخضرا اللى ترد الروح مش زى عندنا اللى كل المساحات عندنا سودة و وقورة 

زوجـــــة لـــلـــــه

على الرغم من أنها مخصصة للشباب فقط ...  إلا إن مسن سعودي يبلغ من العمر 80 عاما طلب إدخال اسمه في قائمة إعانة الشباب المقبلين على الزواج... وذكرت صحيفة "عكاظ" السعودية أن موظف جمعية خيرية في منطقة جازان حاول إقناع المسن بأن المساعدة لا تكون إلا للشباب فقط ..  إلا أنه أصر على تقديم الطلب ... مبررا ذلك بأن زوجته الجديدة شابة ... وتبلغ من العمر 20 عاما ... كما أنه يعول عددا كبيرا من الأبناء والأحفاد ويستحق المساعدة على حد قوله. راجل لطيف كان نفسى أشوفه هوة رايح إزاى متشال و لا متسند .. يعنى هوة حايبدأ حياة جديدة و هوة على مشارف لقاء ربه حقيقة إصرار جامد على التمسك بالحياة خصوصا و إن مراته المستقبلية فى ريعان شبابها .... و هوة مش طالب معونة إعاشة و لا إعالة و هوة برضه صاحب عيال و أحفاد و هوة كان كل طلبه مش إزازة زيت و لا كيس رز و لا باكو شاى كل اللى طالبه معاونة فى الجواز الجديد .... فكرنى بالشحات الأبهة اللى يديله ربع جنيه يرميه فى وشه  .... و يطلب الحسنة بالدولار أو الإسترلينى و انا متصور إن الشحاتة فى الوقت الجاى حاتكون زوجة جميلة تمنع بلاوى كتيرة

و الله .. شــرطـــة تــجـــنـــــن

تبحث الشرطة في مقاطعة ويلز عن صاحب مطعم هندي أقفل محله منذ سنوات بعدما استلمت رسالة بداخلها ثمن وجبة عشاء من شخص مجهول اعترف بأنه لم يدفع فاتورة الطعام قبل خروجه من المطعم في عام 1996. 
وذكرت شبكة سكاي نيوز الاخبارية البريطانية أن الشرطة تلقت الرسالة وبداخلها مبلغ 60 جنيهاً استرالياً

وجاء في الرسالة " إن ثمن وجبة الطعام والمشروب الذي تناولته كان دون العشرة جنيهات استرلينية مضيفًا ولكني قررت دفع مبلغ أكبر من أجل التعويض علي صاحب المطعم لأني نسيت دفع ثمن وجبة الطعام وخدمات الجرسون . وطلب صاحب الرسالة من الشرطة الاعتذار بالنيابة عنه لصاحب المطعم  و الذى أغلق قبل سنوات وبنيت مكانه بناية للشقق الفاخرة. 
وناشدت الشرطة المواطنين مساعدتها في العثور علي صاحب المطعم من أجل إعطائه المبلغ.  ظريف قوى الراجل دة اللى إفتكر اللى عليه بعد 9 سنين كاملة و معملش نفسه ناس و إفتكر إن الراجل صاحب المطعم هوة اللى نسى الموضوع دة .... و بعدين الشرطة سايبة شغلها المهم و هوة ضبط المؤامرات و الدسائس اللى ويلز فيها و سايبة مهمتها الأصلية و هية حماية النظام الموجود و شاغلة نفسها بحاجات هايفة ما يتحرق صاحب المبلغ على المطعم نفسه على الستين إسترلينى على بعض و إحنا مش فاضيين للقرف دة .. لكن لأ . هوة دة مهمتنا إقامة العدل ... مهمتنا إشاعة الحق .. مهمتنا توصيل الأمانات لصحابها مش أكلها أو توزيعها أو إغتصابها  ... و بعدين مين صاحب المطعم دة واحد هندى حقير و قاعد عندنا و بيستفيد من خيرها و جوها  لكن بسم الله ما شاء الله ربنا فتح عليه و بقى من أصحاب الملايين الإسترلينية بدل الملاليم اللى بعتهاله صاحبنا ....  و آخر حاجة و أحلى حاجة إنها عاملة مناشدة لأصحاب القلوب الرحيمة إنها تدور على الراجل المطلوب عشان تديله فلوسه مش تاخد فلوسه و هدومه ....

مــطــــلـــوب مــشـــرشــــــح

شهدت مدينة عثمانية جنوب تركيا  حادثاً فريداً  أفرزته أجواء الانتخابات المحلية التي ستجري  في 29 مارس .. ووعود السياسيين لاصطياد أصوات الناخبين. ففي عملية تنديد برفض الحكومة تقديم دعم مالي لمنتجي الفول السوداني  قام حشد من المزارعين مع عوائلهم بتشييع جنازة رمزية للفول السودانى  وقبيل التشييع القي رئيس الغرفة التجارية  حسين تشليك كلمة أمام الحشد تحدث فيها عن قطع رئيس الوزراء أردوغان وعداً قاطعاً لهم في العام المنصرم بتقديم دعم مالي لزارعي الفول السودانى الا أن وزارة الزراعة لم تدرجه  في قائمة المنتجات الزراعية المدعومة مما أصابهم بأضرار جسيمة سيضطرون معها الي التخلي عن زراعته. وفي ختام الكلمة ارتدي تشليك الجبة والعمامة وشارك بين نحيب النساء في جنازة رمزية وضع فوقها قلائد مصنوعة من الفول السوداني  وكتب عليها عبارة  "مات لبقائه وحيداً دون دعم " أولا شكر الله سعيكم و البقاء لله ... و كان نفسى أشوف حسن تشليك و هوة بيصوت و يعيط مع الستات التركيات ... لأ .. و مين اللى بيشارك رئيس الغرفة التجارية بنفسه و هوة برضه اللى تواضع و قلع البدلة و الكرافتة و لبس الجبة و العمة و منديل أبو قورة و هات يا عياط و شرشحة و صوات و مين الميت يا جدعان ... الفول السودانى  ...  ياريت إحنا كمان نعمل جنازات زى بتاعة إخوانا الأتراك على القطن المصرى طويل التيلة و قصير التيلة و متوسط التيلة و على القمح المصرى و على القصب المصرى و على الرز المصرى و إحنا مجهزين كل حاجة السرادق و المشايخ و النعوش و الستات اللى حاتصوت و الناس اللى حاتشيل النعوش ... بس ناقص حاجة بسيطة إن إحنا نقنع أحد المسؤلين ييجي يشرشح معانا 

وزيـــر بـــيــــجــــرى .. يا جـدعــان

اضطر وزير العمل الألماني أولاف شولتز لخفض وزنه بنحو 15 كيلوغراما من أجل زوجته. 
وقال الوزير (50 عاما) إن وزنه وصل في الوقت الحالي إلي أكثر من 70 كيلوغراما بقليل بفضل رياضة الجري التي يمارسها بانتظام، موضحا أنه يستغل بقاءه في العاصمة برلين في الجري في مضمار السير، بينما يستغل وجوده في هامبورغ في الجري علي ضفاف نهر الإلبه. 
وكشف الوزير عن سر الرشاقة التي أصبح يتمتع بها وقال إنه يجري من مرتين إلي ثلاث مرات أسبوعيا لمدة ساعة علي الأقل ليحافظ علي صحته، نافيا أن يكون حرصه علي ممارسة رياضة الجري للتخفيف من ضغوط العمل، وأكد أنه يفعل ذلك من أجل عيون زوجته

أول مرة أعرف إن فيه راجل بيعمل حاجة عشان مراته .. كنا زمان نعرف إن الست هية اللى بتعمل كل حاجة عشان جوزها و أبو عيالها عشان خاطر تعيش و آهو ضل راجل و لا ضل حيطة .... و بعدين هوة إختار الجرى و إحنا مش عارفين هوة بيجرى من قبضة مراته القوية و لا بيجرى من إيه بالظبط و الله أعلم بالنوايا ....  و كمان هوة وضح إنه بيجرى عشان عيون زوجته اللى إحنا ما شوفنهاش و لا عارفين إنها تستاهل و لا .. لأ  .. آخر حاجة هوة بسلامته وضح إنه بيجرى مش من أجل التخفيف من ضغوط العمل لأنه أصلا وزير العمل و كمان معندهوش عاطلين و لا مشاكل فى تأمينات العمال و لا مشاكل فى الترخيص و لا الأمن الصناعى و لا الصحة و لا الدفاع المدنى  ... إفتكرت ناس وزرا عملوا ماتش كورة مع بعض و طبعا كسب رئيس الوزرا  ...  لكن على كل حال ربنا يخلى العريس الألمانى و عروسته ... عرسان آخر زمن    

أرجــــــوكــــــم مــــحــــدش يــــمــــدحـــــنــــــى

في محاولة للتعبير عن إعجابها بزوجها  اتصلت سيدة بريطانية برقم طوارىء 999

الشرطة لما يزيد على 400 مرة من أجل أن تتحدث وتثرثر وفي إحدى المكالمات امتدحت

السيدة زوجها وكشفت انه يدرس النازية وفترتها التاريخية وقد اخبر العاملون على تلفونات

الطوارىء القاضي بهذه المعلومات فاعترفت دونكومب بأنها تضيع وقت الشرطة وتم الحكم

عليها بغرامة قدرها 200 جنيه استرليني.

200  استرلينى شوية جدا المفروض على الأقل 400 لانها اتكلمت 400 مرة 

إيه طول البال بتاع الشرطة انها تسمع لنفس الست 400 مرة دون إعتقالها هية و جوزها و جيرانها اللى سمحوا انها تتكلم العدد دة 

برضه حبها لجوزها أذاه فى جيبه و كان ممكن يؤذيه فى شغله أو حريته أو حياته 

الحمد لله إن الشرطة فى بلدنا بترد عليك وحش من أول مرة عشان تحرمك تتصل تانى و

آهو كله لمصلحتك و انا حذرت مراتى لو عايزة تمدحنى  لو عايزة يعنى ابقى إمدحينى فى

وشى لو سمحت أنا مش قد الحكومة  و من يومها و علاقتى سيئة بيها لأنها مصرة تمدحنى 

على الملأ 

بـــطـــاطــــس بـــالــــنـــمــــــل

 أكد مجموعة من أطباء الصين أن إضافة النمل إلي الطعام وصفة جديدة لإطالة العمر...

وتقوية جهاز المناعة  ... وكذلك التخفيف من آثار التهاب المفاصل أو الروماتيزم‏ ولفتوا

النظر إلي أن من بين المعمرين الخمسة في العالم يوجد منهم شخصين في الصين‏ ‏و كله بفضل النمل 

اولا الله يقرفكم 

ثانيا الله يهدكم عشان مش عاتقين حاجة كله داخلين فيه القمر الصناعى و السعرالرخيص ...

و الإختراعات المذهلة و دخلوا كمان على النمل ... و الله أعلم بكرة يخشوا على الصراصير و البق و البراغيت 

صحيح عندهم معمرين كتارقوى عدوا الميت سنة لكن حجمهم يادوبك قد النملة أوالصرصار

وأنا عارف إن كل حاجة عندهم بيترش عليها شوية نمل زى بالظبط شوية الملح أو شوية

البصل ...  بيترش على الشوربة و العصاير  ... و على الطبيخ و المعجنات و الحلويات

حقيقة مش حاقدر أقولكم طعمه إيه !!! أصله ما بحبش النمل الصينى أبدا مالهوش طعم 

الـــشــخـــيـــــر و ســـنـــيـــنـــــــــه

 تبين أن واحداً من بين كل خمسة من المتزوجين في بريطانيا ينام وحيدًا بسبب عادات النوم المزعجة وأولها الشخير .... ووجدت دراسة أن الشخير كان السبب الأول ... تلاه إحتكار أغطية السرير...  ثم التحكم بأكبر مساحة من السرير ...  ثم الضرب  الناجم عن تحريك الأيدي بصورة لا شعورية خلال النوم

الحمد لله إن أنا مش من بريطانيا يا عم دى حتى بلد وحشة و كانت محتلانا  و بعدين الحمد لله مرة تانية إن أنا معنديش غير سرير واحد يعنى معنديش خيار ان أنا أنام عليه صحيح فيه عندى أراضى كتير فى الشقة بس مش للبيع خصوصا بتاعة أوضة النوم 

و الحمد لله مرة تالتة عشان أنا و مراتى لسنا من هواة الشخير إلا فى المناسبات

و الحمد لله مرة رابعة إن فيه بينى و بين مراتى إتفاقية دفاع مشترك و متوثقة فى الأمم المتفرقة إن كل ملليمتر فى البطانية أو اللحاف أو السرير  تقسم بالعدل و القسطاس أنا التلت و هية التلتين و لن أقبل أى كلام فى هذا الموضوع أبدا و اضطرت للموافقة بعد ضغوط كبيرة مارستها عليها  و أما بقى حكاية الضرب فى بعض و احنا نايمين طبعا دة كلام غريب على مجتمعاتنا الشرقية اللى بنضرب بعض و احنا صاحيين عشان ننام مرتاحين 

بــيــعــتــه كـــلـــيـــتـــه يا ولــــداه

أقدم رجل في عقده الثالث من العمرعلى تطليق زوجته التي أجبرته على بيع إحدى كليتيه ليشتري لها سيارة وقال الرجل  لقد

استجبت لطلب زوجتي التي ألحت على بيع احدى كليتي لكي اشتري لها سيارة ففعلت ولكن طلباتها الغالية النابعة عن الحب

بالتفاخر تواصلت رغم ضعف حالتي المادية فقررت تطليقها

 

عيب عليك ياراجل وأنت عندك 30 سنة يعنى بلغت سن الرشد تقول مراتى أجبرتنى على بيع كليتك ... كأنها لاب توب أو

أتارى أو ولاعة .... و بعدين الحمد لله إن احنا مش عارفين أنت منين مصرى و اللا تونسى ...  واللا مغربى و اللا سعودى 

لكن شكلك كدة مصرى و شكل مراتك دى دراكولا...  و شكل كليتك دى جابت يادوبك عربية نصر 128  لكن الحمد لله ان

أنت خلصت منها عشان بعد ما بيعتك هدومك  ... دخلت على الكلية ...  و الله أعلم كان ممكن تبيعك عينك عشان كنت دايما

بتقولها عينية على كل حاجة تطلبها  ... و  طلبت قلبك عشان يبطل يزعجها بضرباته اللى بتدق كل ما تطلب منك حاجة و انت

مش قادر تجيبهالها  ... 

مـــبــروك يـــا تــــيـــــتـــــــة

دخلت الجدة الأمريكية ليندا وولف (68 عاما) رسميًا موسوعة جينيس للأرقام القياسية، بعد أن حملت لقب "صاحبة أكثر عدد من الزيجات" في التاريخ حيث تزوجت 23 مرة. ويذكر أن الجدة تزوجت للمرة الأولى في سن السادسة عشرة بعدما صارت "مدمنة لرومانسية" الزواج ويشار إلى أن أطول فترة زواج عاشتها ليندا استمرت سبع سنوات فيما استمرت أقصر فترة 36 ساعة فقط

و الله الجدة دى لذيذة قوى و دخلت الموسوعة العظيمة دى من باب الزواج الكتير ... مبدأيا مبروك يا عروسة أقصد مبروك يا عروشة  و عقبال البكارى إن شاء الله  ؟؟...  أنا اللى غايظنى مش كتر الأزواج ... لكن موافقتهم على الزواج من واحدة كانت متجوزة من رجالة كتير قبله ... و اللى غايظنى برضة إنهم وصفوها بإنها مدمنة رومانسية أول مرة أعرف إن الجواز الكتير بيجيب رومانسية أنا أعرف أنه بيجيب برد  .. بيجيب روماتيزم ... بيجيب ارتكاريا ... بيجيب ضغط و سكر و ملح و دقيق و يعملوا بيه كيكة 

و اللى محيرنى عملت إيه مع العريس ابو 36 ساعة جواز دة 

الله ما انا مالى انا زعلان ليه ما يتحرقوا فى بعض همة و جوازاتهم

12 جــنـــيـــــه يـــا عـــالـــــــــم !!!

خسرت عاملة ألمانية قضيتها أمام محكمة ألمانية بدعوى "قلة النزاهة" رغم أنها عملت لمخازن ألمانية شهيرة فترة 31 سنة بنزاهة مشهود لها. وكانت العاملة قد تعرضت للاستجواب من قبل رئيس الفرع في يناير  بسبب فرق يبلغ 1.30 يورو بين البضائع المبيعة وكشف حساب خزينة النقود التي تعمل عليها واتضح بعد تفتيش حقيبتها وخزانتها انعدام وجود ما يثبت السرقة عليها

1.3 يورو يعنى بنتكلم  عن حوالى 12 جنيه مصرى و تحقيقات و نيابة و محكمة  ... طب ما ييجوا عندنا يشوفوا ال12 مليون جنيه اللى اختفت بقدرة قادر من دفاتر الوزراة  و لا حس و لا خبر و كانت النتيجة شدة ودن من رئيس الوزارة  للوزير المختص انه ما يعملش كدة تانى و إلا حايشدله الودن التانية  و لو تجرأ و عملها لتالت مرة حا يشتكى للسيد الرئيس وهوة بقى اللى حا يشدله ودنه و من المعروف ان الريس ايدة طارشة و طخينة 

و لفت نظرى الريس الجبان بتاع المصلحة الألمانية اللى الست بتشتغل عنده بقالها 31 سنة و كانت مثال الشرف و الأمانة و النزاهة و تييجى على غلطة للماكينة بتاعة الحساب يحصل للبنية كل دة  ... بصراحة نفسى أشوفك و انا اللى حا شدلك ودنك 

طـــفـــــل حـــســـــب الـــطــــلـــــــــــب

طرحت عيادة لتخصيب الأجنة في لوس أنجليس الأمريكية على الراغبين في إنجاب أطفال "حسب الطلب" و هى الفرصة الأولى من نوعها حيث تقدم عيادة "معاهد التخصيب" هذه الخدمة لأي زوجين يرغبان في الحصول على مثلا طفل ذكر ذوعينين عسليتين وشعر أسود وبشرة داكنة أو طفلة شقراء ببشرة فاتحة وعينين خضراوين

أولا مبروك الجواز و ان شاء الله حياة سعيدة  و بعدين الخلفة دى بتاعة ربنا مش بتاعتنا أعرف ناس متجوزين من عشرين سنة و مفيش نصيب و ناس تانية مكملوش شهر و ربنا كرمهم آخر كرم 

لو ممكن الجمعيات دى تحقق اللى احنا عايزينه ... عايزين قلب نضيف يحب ما يكرهش ... عايزين عقل نضيف يبنى ميهدمش ... عايزين نفس طيبة و راضية و قانعة مش أمارة بالسوء  .. عايزين مشاعرجميلة كلها هناء  و سرور و حب  مش تمنى الشر و زوال النعمة ... عايزين روح عالية تتوق لمعالى الأمور مش تنزل لسابع أرض  

طبعا لو الجمعيات دى عملت دة حتقفل مصانع الأسلحة و عيادات الدكاترة و المتنزهات  لكن أختم و أقول انا مستعد يكون عندى طفل أسود و مناخيره كبيرة و شفته عاملة زى كونتا كنتى  و عينه حولة و شعره أكرت بس يكون عنده قلب أبيض و عقل متفتح و نفس طيبة و مشاعر جميلة و روح وثابة