2 كـيـــلـــو زفـــــــــت

كشقت دراسة أن المدخن الذي يستهلك سنوياً ربع لتر من القطران سوف يتراكم ويترسب

داخل جسمه بمعدل علبة سجائر يوميا. وأوضحت الدراسة أن استهلاك 3600  لترًا من

القطران القار لعدد 15 ألف مدخنًا راجعوا عيادات مكافحة التدخين العام المنصرم كافية لرصف شارع بطول 2 كيلومتر.

و الله أنا مستغرب جدا ان كل يوم بتتطلع إحصائية قاتلة عن التدخين و برضه مش نافع 

و منظمة الصحة العالمية هارية نفسها دراسات و مقالات و أبحاث و ندوات و نقاشات و برضه مفيش نتيجة 

لدرجة ظهور تشريعات تجبر شركات صناعة الدخان  على كتابة التخين ضار جدا بالصحة و برضه النتيجة فى زيادة 

و بعدين أجبروا الشركات دى إنهم يكتبوا مع التخين ضار جدا بالصحة  و يسبب السرطان 

و بعدين كل اللى فات بالإضافة إلى عبارة  و يسبب الوفاة 

و بعد كل اللى فات  صوروا على علبة السجاير  واحد فى الإنعاش و حواليه الأجهزة و المؤشرات اللى أكيد بعدها حايموت 

لكن فى الآخر لقوا جوة بطن المدخنين شارع أبو قير و مرصوف بالقار  و

طوله 2 كيلو و عليه أكشاك بيع السجاير 

هتلر عنده إمساك يارجالة

كشفت وثيقة سرية أن الزعيم النازي الألماني هتلر كان يعاني من سلوكيات مفزعة على المائدة وكان يأكل كميات كبيرة من الكعك والجاتوه الأمر الذي يؤدي عادة إلى عسر الهضم. وكان هتلر يقرض بلا تفكير أظافره ويحك سبابته تحت أنفه. وكانت عاداته على المائدة صادمة.

أخيرا عرفت ليه هتلر كان دموى و يعشق القتل و الدمار و النسف 

يعنى هوة سيادته ياكل كحك و جاتوه و يجيله إمساك و يطلع غله و ضيقته على الدول الغلابة 

و عرفت كمان انه من كتر حك مناخيره بايده  كان شنبه زغير و محندق 

و عرفت ليه كان بيزعق فى خطبه زى المجنون اتاريه كان مزنوق و ربنا يكفيكم شر الامساك و كمان شر الاسهال 

و عرفت ليه كانت التحية النازية انه يرفع ايده لقدام  عشان  الناس كلها تشوف النضافة بتاعة ضوافره  و بتاعة ايده المقدسة

هو ليه كل الحكام مجانين ؟؟ !!

الرخام = السلام

حطم البطل السوري العالمي حسن محمد الحسين عشرة أطنان من الرخام في محاولة غير مسبوقة بعنوان "سوريا بلد السلام والمحبة"، وذلك تمهيدًا لدخول موسوعة جينيس للأرقام العالمية. وتضمنت التجربة تحطيم 10 أطنان رخام موزعة على خمسة آلاف قطعة رخام بطول 60 سم وعرض 6 سم وسمك 1.5 سم.

مش عارف ليه حكاية موسوعة جينيس عاملة تربنة للناس و الكل عايز يدخلها  كأنه داخل الجنة  يا خى

و اللى لفت نظرى و اكيد لفت نظركم انه حطم 10 طن رخام عشان يثبت ان بلده بلد سلام و محبة  امال لوكان عايز يثبت ان بلاده بلد الدمار و الحرب كان رمى على الناس  10  طن ورد !!

و ايه العلاقة بين الرخام   و السلام و المحبة انا شايف ان العلاقة الوحيدة ان كلهم فيهم حرف  الميم  و ان كلهم  متكونين من 4 حروف  !!

لكن ارجع و اقول ان البطل السورى عمل اللى يقدر عليه فى حدود طاقته و معرفته و تخصصه  .. الدور و الباقى على  الباقى !! 

قمر صناعى ... و تخلف صناعى

تعتزم ايران إصدار عملة ورقية ومعدنية جديدة عليها صور اول قمر صناعي مصنع محليا، وذلك بعد اسابيع قليلة من ارسالها قمرا صناعيا للابحاث و الاتصالات اطلقت عليه اسم "أوميد" الى الفضاء. و اعطت الحكومة الاذن للبنك المركزي باستخدام صور القمر ومنصة اطلاقه على كل من عملتيها الورقية والمعدنية.

الف مبروك يا إيران و عقبال عندنا  

احنا التكريم عندنا بيبقى على طوابع البريد يعنى اللى يحس بيه بلاد برة اما الناس اللى جوة يتحرقوا بجاز

و بعدين احنا عملنا إنجازات إيه عشان  تستحق تتحط على الفلوس  آخر إنجاز اتحط على الفلوس كان رمسيس التانى و جامع عمرو بن العاص 

و الاهرامات 

لكن فين السد العالى  ..  فين قناة السويس  ... فين توشكى ... فين الصحراء اللى اتقلبت خضرا ... صحيح فيه انجازات تستحق التكريم  بس كلها او معظمها انجازات فردية او شخصية  لكن فين الانجازات الجماعية  ... فين الانجازات الحكومية او الرئاسية لو كان فيه كانوا ملوا الدنيا صراخ و تهليل 

غـــنـــى بـــــرة احــــســـن مـــاتــــغـــــنــــى عــــلــــيـــــة

نجحت ربة منزل من كوريا الجنوبية في تحطيم رقم قياسي في الغناء المتواصل بعدما تمكنت من الغناء على المسرح أكثر من ثلاثة أيام دون انقطاع مما يعزز فرصتها في الدخول في موسوعة "جينيس" للأرقام القياسية. وبدأت كيم سيوك أوك (54 عاما) الغناء قبل ظهر يوم الأربعاء الماضي في إحدى الحانات بالعاصمة سيول ولم تتوقف عن الغناء إلا بعد ظهر السبت الماضي بناء على طلب من عائلتها. وغنت كيم خلال 76 ساعة وسبع دقائق 1283 أغنية لتحطم بذلك الرقم القياسي الحالي المسجل في موسوعة جينيس والذي حققه الأمريكي ماركوس لابرات بغنائه 75 ساعة دون انقطاع.

برافو يا كيم  بس عايز اعرف هل كان فيه جمهور فى المسرح دة و اللا لأ 

ربنا يخليلك عيلتك اللى وافقت على تركك البيت و تغنى 3 ايام كاملة  اكيد قضاء اخف من قضاء و اكيد قعدتك فى البيت سودة او زرقة 

يا شيخة شوفيلك طبق اغسليه او مطبخ رتبيه او عيل ذاكريله 

كنت حافظة ازاى يا كيم 1283 أغنية  و اللا كنت بتخمى و تعيدى أغانى  و الناس نايمة منك  روحى احفظيلك كلمتين من الانجيل و اللا التوراة او حتى الزبور او اى كتاب سماوى !!! 

تجميل بطعم الموت

تنفق امرأة بريطانية تعاني من ورم في الدماغ يتعذر علاجه، أربعين ألف جنيه استرليني على عملية تجميل كي تموت وهي تشبه نجمتها السينمائية المفضلة ديمي مور. وقالت المرأة إنها ستقوم بنفخ شفتيها وتكبير حجم صدرها ورفع حاجبيها وشد جلدها وتقويم أسنانها لتحقيق حلمها في التشبه بالممثلة الأميركية قبل رحيلها عن الحياة.

طبعا انا مش زعلان لان  دى فلوسها و تعمل بيها اللى هية عايزاه 

و كمان اللى معاه قرش  و محيره يجيب حمام و يطيره 

و بعدين  الدكتور حايعمل إيه فى الخلقة اللى قدامه اللى كل حاجة فيها عايزة تقويم عشان تبقى زى ديمى مور 

و انا حاسس ان الأربعين الف استرلينى كتير جدا يعنى احنا قريب من نص مليون  جنيه مصرى و الدكتور عمل عرض كويس جدا ليها  نفخ الشفتين و تلوين الشعر عليهم هدية  رفع الحواجب و يبقى المبلغ 400 الف بس

الواحد لما يحس انه حايقابل رب كريم  يبقى عايز يقربله و يصليله و يروح الكنيسة و يترهبن  و يخلى عنده دم شوية بدل ما ربنا يسألها عملتلى إيه فى دنيتك  تقوم ترد عليه سبحانه و تعالى و تقول عملتلك ديمى مور إيه رأيك يا بيبيى  .... خسئت و ثكلتك امك  

قلبى آى يا قلبى

إذا كنت تسكن بجانب مطعم للوجبات السريعة فعليك الحذر ، بعد أن اظهرت دراسة حديثة

أن مجاورة المطاعم في السكن يزيد خطر الإصابة بأزمة قلبية لدى المرء.وقالت الدراسة إن

البيانات تشير إلى أن كل مطعم  يرفع خطر التعرض لأزمة قلبية بنسبة واحد في المائة

لسكان المنطقة التي تحيط به، وكلما ارتفع بالتالي عدد المطاعم في المنطقة، ازدادت المخاطر بالنسبة للسكان.

الدراسة غامضة زى ما حضراتكم شايفين و انا بعون الله حاشرحها ليكم  بهدوء 

*  اللى ساكن جنب مطعم فول و طعمية عادى  يبقى  الشريان اليمين و الشمال و اللى فوق و

اللى تحت  راحوا فى داهية و البقاء لله 

* اللى ساكن جنب مطعم فول و طعمية مشهور زى ابو ربيع و ابو كمال و أبو  أى حد يبقى

اليمن و الشمال و جزء من اللى فوق  راح فى داهية و مطلوب نقله إلى الإنعاش فورا و مطلوب  معجزة  تنقذه فى زمن انتهت منه المعجزات   

 * اللى ساكن جنب مطعم  كبدة و مخ و طحال عادى  لازم يكون عامل عقد مع حانوتى قريب

منه  و عامل نعيه  و حاطه فى جيبه و ماشى بيه

* اللى ساكن جنب مطعم مشويات عادى  الأكل ممنوع عليه بحكم  امر الدكتور  و ليس بحكم انه مفلس  لكن الشم ممكن بس يكون معاه انبوبة اكسجين فى البيت بشكل دائم 

* اللى ساكن جنب مطعم مشويات مشهور حسنى   بقش   ابو شقرة  ابو راوية  لو حايعطفوا عليه و يدولوا كل اسبوع نص كيلو مشكل يبقى قلبه حايكون حديد  و لكن لو محدش سأل فيه و لا فى عياله اكيد القلب يضعف و الأورطى يشتكى و الأذين و البطين راحوا فى ستين الف داهية و ابقوا بلغونا ميعاد الجنازة امتى  !!!!

الحمد لله انا من مصر

إذا كنت من سكان سنغافورة فعليك الحذر من تلبية نداء الطبيعة والتبول في الطريق العام

 حيث اضطر سائق تاكسي إلى دفع غرامة 655 دولارا بسبب تبوله خلف صندوق للكهرباء

على الطريق ، متجاهلا نداءات سائق سيارة أخرى ورفقاء له بالتوقف عما يقوم به.

الحمد لله أولا إن أنا مش من سكان سنغافورة   

ثانيا الحمد لله برضه إن أنا فى بلدى مش عارف يعنى إيه طبيعة  و إيه هوة نداءها 

و الحمد لله ثالثا  إن مفيش فى بلادنا حاجة اسمها الطريق العام  و اللا حاجة اسمها الطريق

الخاص  كله داخل فى بعضه

واللى الخبر مش موضحه هل سبب الغرامة انه تبول خلف صندوق الكهرباء يعنى كان من

المفروض  إنه يعمل عملته فى مكان تانى عشان خايفين عليه يتكهرب خاصة وإن جسمه

مفتح شوية و عريان شوية  

 

مش عارف إزاى رفقاؤه طلبوا منه الطلب الغريب دة إنه يتوقف عما يقوم به  ان كان هوة

فعلا بدأ عملته لا يمكن  أبدا إنه يوقفها و يورونا همة 

و موضحوش هل هذه الغرامة الكبيرة عشان هوة سواق تاكسى و اللا الغرامة دى حتى لو

كان سواق ميكروباص أو أوتوبيس أو ملاكى !!!!

واء واء عـــايـــز كـــوكا ... يــــيـــن

 انتهى الحال برضيع لم يتجاوز شهره الخامس إلى إيداعه وحدة العناية المركزة بأحد المستشفيات فى البرازيل إثر تناوله

جرعة زائدة من الكوكايين عثر عليها على سرير والدته  المدمنة ذات ال  18 عاما ويجري التحقيق حاليًا فيما يتوقع حرمانها منه 

طبعا الرضيع غلطان من ساسه لراسه رغم ان السن  دة مالهوش لا ساس و لا راس  و لا قلقاس  ... كل الرضع فى البرازيل

والشباب و الكبار عندهم مرونة فائقة ... و نظرة ثاقبة .. و خيال واسع  زى عمنا رونالدينهو  و خالنا  روبينهو  و جدنا بيبيتو

وروماريو   و أكيد عمل شقلباظ على حتة الأفيونة  أو الكوكايينة و على بق سيادته طبعا هوة مش عارف تمنها اللى أمه

اتشحتفت لغاية ما جابتها عشانه و شوفوا تضحية الأم وصلت لغاية فين و البنت دى اللى هية أمه مشغولة بالكيف و الهباب و

سايبة ضناها اللى لسة لحمة حمرا أو بيضة و رايحة تشم  .. طب شمى جنبه  .. ايديه لأمك و اللا اختك  جتك القرف امهات

الأيام دى 

جـتــك بـطـيـخــة فــى قــلـــبــــــك

 نجح استرالي في تحطيم رقمه القياسي بتكسير 47 بطيخة برأسه في 60 ثانية في

مهرجان البطيخ ببلدة شينشيلا الاسترالية. وذكر القائمون على المهرجان أن جون ألوود

نجح العام الماضي في تحقيق رقم قياسي في مهرجان شينشيلا للبطيخ بتكسير 40

بطيخة خلال دقيقة واحدة، وهي المدة المحددة لهذه المسابقة.

الخبر ما كملش راسه حصلها إيه  جاله نزيف .. جاله إرتجاج  ... جاله هياج .. جاله

جنون ... لكن عموما برافو  .. دماغ ناشفة  و متينة  و مخ غلبان  و عقل منيل .. و

تفكير غريب ... لكن همة حققوا السعادة لنفسهم و مبسوطين من عمايلهم الغريبة دى 

لكن إحنا الحمد لله معندناش بطيخ بالحلاوة دى و لا الحمار دة  عشان نزعل عليه 

و برضة لما نكسره على دماغنا  بنزعل و نقريف 

أصل فيه حاجات كتير بتنكسر على دماغتنا كل شوية و ساكتين و كأنها بتنكسر على

دماغ ناس تانية و بنقول البطيخ هوة السبب عشان مليف و حمضان من جوة  و

مالهوش طعم و لا ريحة و لا حتى فيه بذر  و الحقيقة الراجل رماه على راسى بحنية

ادفـع ثـمـن مـأ تـم ضـحـيـتـك

يناقش البرلمان الاسكتلندي مشروع قرار قد يجبر الذين يتسببون بحوادث مرورية قاتلة

على دفع تكاليف مآتم دفن ضحاياهم. وإذا ما وافق البرلمان على مشروع القرار فإن المدانين بجرائم قتل أو المتورطين بحوادث سير سوف يجبرون على دفع جميع تكاليف الدفن

قرار جميل بس ما قالوش إن المأتم دة كام نجمة   و برضه ماقالوش هل المبلغ بتاع

الشادر حسب إمكانيات الضحية أو تبع إمكانيات السيد المتهم   و برضه لم تحسم نقطة

هل الموضوع دة يعفى المتهم من السجن  و هل الشادر بالمشاريب و القهوة السادة على

روح الضحايا    سرحت بخيالى و قلت دة نهاره و ليله أسود اللى يكون عنده  باخرة  

غرقت  أو أوتوبيس انقلب أو مسرح اتحرق أو قطار ولع  حايعمل   شادر لمين  و اللا

 مين