إعــتــذار أردنــــــــى

لم يجد زوج أردنى وسيلة للإعتذار لزوجته عن خلاف نشب بينهما سوى الإستعانة بلافتة

وضعها أمام مقر عملها طولها خمسة أمتار وعرضها 8 أمتار مكتوب عليها "حبيبتي

وحياتي وصديقتي وزوجتي الرائعة أم إبني ... اعتذر من كل صميم قلبي على ما بدر مني

من أخطاء طوال حياتنا الزوجية وأعدك أن تكون حياتنا المستقبلية قائمة على الحب

والإحترام كما كانت".

طريقة جديدة جدا فى مجتمعاتنا العربية الشرقية فى الإعتذار لشريكة حياتنا اللى كانت زمان

هية اللى بتعتذر لجوزها حتى لو كان هوة اللى غلطان ... و كانت الحكاية كلها تتلخص و

جوز جزمة ينهى المشكلة من غير حد ما يسمع أو يحس ... لكن إنى أكتب عريضة 8x5

متر قدام كل الناس حاجة كويسة لكن واخدينها من ثقافات تانية و بعدين أنا مستغرب إزاى و

هوة من الأردن اللى هية أصلا شريط صغير جدا لقى مساحة فى الفضاء 40 متر مربع

منين!!! و كمان مانعرفش هل المدام بعد دة كله قبلت الإعتذار و كتبت لوحة و لو حتى

10 متر مربع قدام شغل جوزها أو حتى قدام بيتها او قدام بيت حماتها كل دة ما منعرفهوش

و همسة فى ودان الزوج دة أنت أكيد عملت بلاوى متلتلة عشان تكتب فى المساحة دى كلها

إعتذاراتك و توسلاتك

يـابـخـتــك يا أرنـب .. يا ابـن الـمـحـظـوظــــة

دفعت المغنية البريطانية ليونا لويس نجمة برنامج "إكسير النجاح" 100 دولار لانقاذ

أرنب من الموت و أخذته إلى منزلها للاعتناء به وتربيته حيث قررت المغنية الشابة شراء

الارنب من رجل متشرد كان ينوي ان يأكله فدفعت له هذا المبلغ مقابل ان تاخذه لينعم

بالحياة.

و لية ملاحظات 1 - اللى عمل كدة واحدة بريطانية مش فرنساوية و مش بريجريت باردو

2 - هية دفعت 100 دولار عشان تنقذ الارنب المحظوظ مش الراجل اللى مش لاقى ياكل

3 - بمعنى آخر اللى كان هاممها الحيوان مش الانسان

4 - عموما هية أحسن من غيرها اللى بيسمموا الكلاب و يضربوهم بالنار قدام النيا كلها

5 - و أحسن من ناس تانية ممكن تاخد الحيوان من الانسان ببلاش و تديلوا على قفاه بالإيد

و على مقعدته بالرجل و على وشه بالتف و على شرفه بالشتم

6 - يعنى عايز أقول ان البت الإنجليزية دى أنقذت فى الآخر الحيوان و برضه الانسان

بالمرة ... طب و مالو

7 - السؤال ليه مخدتش معاها الراجل المتشرد البيت تأكله و تشربه و تعتنى بيه زى الأرنب

ناس معندهاش دم يا جدعان

تــحــيــا فــلــســطــيـــن

حطم أطفال قطاع غزة الرقم القياسى لإطلاق الطائرات الورقية المسجل فى موسوعة

جينيس للأرقام القياسية ... وشارك ستة آلاف طفل وطفلة على شاطئ البحر بإطلاق

طائراتهم الورقية قاموا بإعدادها خلال المخيمات الصيفية ورفع الاطفال 3000 طائرة

ورقية محطمين الرقم القياسي السابق وهو 710 طائرات ورقية حققتها ألمانيا فى العام

2008 .

شايفين الشعب اللى عايز يعيش ... شايفين الشعب اللى بيفجر طاقات أطفاله ... شايفين

الناس اللى محتلة من 1948 و 1967 وصلوا جينيس من اى باب .. من باب الاطفال

بس همة وصلوا لقلب العالم الحر من باب الرجالة بتوعهم و الستات بتوعهم اللى صامدين

فى وش العدو بتاعهم و بيقولوا ان احنا لسة عايشين ما موتناش .. لو النهاردة بطيارات

ورق بكرة بطيارات حقيقية ... على فكرة الالمان كانوا أول ناس يروحوا فلسطين و

يستعمروا حى كامل فى حيفا اسمه كارملهايم .. يمكن عشان كدة كانوا مصرين يتفوقوا

عليهم حتى و لو فى موسوعة جينيس أو لو فى غزة مش فى حيفا

صــرخـــة لــلــه ... يــا مــحــســنــيــن

أقيمت مسابقة للصراخ حاول خلالها المتسابقون تحطيم الرقم القياسي لأعلى صرخة في

موسوعة جينيس للأرقام القياسية. وكان أحد عشر متسابقا قد تأهلوا من وسط أكثر من ألف

وخمسمئة من المشاركين في المسابقة التي جرت في باتايا بتايلاند. وجاء الروسي سيرغي

سافيلييف على رأس الفائزين حيث بلغت قوة صرخته 116.8 ديسيبل وفاز بـ 882

دولارا. لكنه لم يدخل الموسوعة و لم يحطم الرقم القياسى الذى بلغ 129 ديسيبل و المسجل

باسم جيل دراك البريطانى

ياعم لوعايزين حد يصرخ بالجامد قوى و الله عندنا فى مصر ناس جدعان قوى و صوتهم

يجيب آخر المحافظة

عندنا ناس بتصرخ من الاسعار على طول و بقوة 200 ديسيبل و ناس بتصرخ من

البطالة و بقوة 300 ديسيبل ... وناس بتصرخ من العنوسة بقوة 400 ديسيبل ... و ناس

بتصرخ من الفراغ و بقوة 500 ديسيبل ... و ناس بتصرخ من الإهمال بقوة 600

ديسيبل ... و ناس بتصرخ من مسلسل التوريث بقوة 700 ديسيبل ... و ناس بتصرخ من

الاستقرارالسياسى اللى بقاله 30 سنة من غير تقدم ملحوظ فى أى مجال بقوة 800 ديسيبل

... و ناس بتصرخ من الجوع بقوة 900 ديسيبل ... و ناس بتصرخ الزهق و القلق و

بتصرخ من التوتر و الشد العصبى و بتصرخ خايفة من بكرة بقوة 1000 ديسيبل

و كل دول يستحقوا يخشوا موسوعة جينيس مش الجدع بتاع روسيا اللى بيصرخ و هوة

فرحان و سعيد انه هايخش الموسوعة لو صرخ اعلى من الجدع بتاع بريطانيا

و الله لو أعرف ان الصرخة دى ب 800 جنيه مش دولار كنت رحت صرخت ييجى مائة

صرخة

عــفــارم عـلــيــك يـا سـت لـويــز

قرأت معمرة بريطانية تدعى لويز براون 91 عاما نحو 25 ألف كتاب خلال سنوات عمرها

فقد بدأت قراءة نحو 12 كتابا في الأسبوع منذ عام 1946 .. ولويز تعد أكثر قراء بريطانيا

"نهما" للكتب ويقول عنها العاملون في المكتبة المحلية إن عاداتها النهمة في القراءة خلال

ستين عاما يمكن أن تؤهلها لتحتل مكانة مرموقة في موسوعات الأرقام القياسية.

25 ألف كتاب يا ست لويز حاجة خيال طبعا .. نفسى تكلمى شبابنا العربى و رجالة العرب

و ستات العرب إزاى يقروا .. إزاى يختاروا اللى بيقروه ... إزاى يبقى عندهم صبر

على القراية .. إزاى يكون عندهم إرادة المعرفة ...إزاى يكون عندهم رغبة التعلم و التثقف

يا عالم يا عربى .. انت المخاطب من ربنا سبحانه و تعالى انك تقرأ و تتعلم و تفكر و تعمل

مش الست لويز