..كثيرا ما تعاني الستات من تقطيع البصل الذي يسبب حرقان شديد ودموع في العين فأخيرا نجح علماء من نيوزيلندا في
التخلص من المادة التي تسبب الدموع عند تقطيع البصل أو تقشيره. وأضاف العلماء أن طرح هذا البصل في الاسواق
يستغرق نحو 10 سنوات على الأقل.
طبعا دى بشرى سعيدة لكل ستات العالم العربى و الإسلامى اللى بيخشوا المطبخ أصلا .. بس اللى عندهوم شغالات
فليبينيات أو هنديات أو سريلانكيات مش حا تفرق معاهم خالص إنهم يخلوا البصل ما ينزلش دموع أو التوم يبقى من غير
ريحة أو الرنجة و الفسيخ منزوع النتانة أو التفاح اللى هوة نفسه لما تيجى تقطعه يقعد يعيط على صدرك و على بقك
واللا المنجة لما تيجى تلتهمها على الحوض تقولك على مهلك واحدة واحدة
البحث العلمى مش حا يخلص و مش حا ينتهى من دنيتنا إلا لما القيامة تقوم عشان دى سنة الحياة عمل و بحث و
ملاحظة و تدقيق يا ريت بقة علماءنا يتحركوا شوية و يعملولنا حاجات حلوة كدة بطيخ من غير بذر .... موز من غير
قشر ... خيار من غير هرمونات .... فراولة اللى ريحتها كانت بتجيبك من آخر الدنيا .... بطاطس من غير بودرة ...
شاى من غير تراب .... سكر من غير دقيق .... عيش من غير صراصير ,... فول من غير سوس ... طماطم من غير
دود ... مية من غير جراثيم ... مية معدنية بجد مش مية بحر متحلية و نسوا يحطوا السكر ... لبن من غير ما يتغش
نفسنا فى البطيخ النمس بتاع زمان و طعم زمان ... نفسنا فى الجزر الأحمر بتاع زمان و طعم زمان ... نفسنا فى اللحمة
بتاعة زمان و طعم زمان من غير لحم الحمير و الكلاب ... نفسنا الزمن كله يرجع زى زمان
نفسنا فى أخلاق زمان .. و روح زمان .. و فن زمان ... و رجالة زمان ... و ستات زمان بس مش زمان قوى يعنى
و زمايل زمان ... و جيران زمان ... و قرايب زمان ... و لعب زمان ... و كل حاجة بتاعة زمان
تفتكروا الأمنية دى ممكن تتحقق
ليست هناك تعليقات:
إرسال تعليق