موتة إنحباسية إنما حلوة قوى !!!

طالعتنا رويترز بخبر جميل إن كوستاريكا وهي دولة رائدة في السياحة البيئية وموطن لبعض أندر الكائنات الحية في العالم

زرعت الشجرة رقم 5 ملايين لعام 2007 في إطار محاولتها للحد من ظاهرة الاحتباس الحراري و هى عبارة عن إنبعاث غازات

مثل ثانى اكسيد الكربون فترتفع درجة الحراراة 10 درجات فيذوب الجليد فيرتفع منسوب المية فى البحار فتبقى كارثة يعنى

غرق محافظات و مدن و خلافه و دى ممكن كمان تعمل كارثة انتشار الأوبئة بين الحيوانات والنباتات البرية والبحرية مع زيادة

مخاطر انتقال  هذه الأمراض إلى البشر .

وغطى اوسكار ارياس رئيس كوستاريكا جذور شجرة البلوط بالتراب في حديقة مكتبه تعبيرا عن الحدث الهام في جهود الدولة

لتفادي ما  يقول بعض الخبراء انها اولى علامات التغير المناخي

وقال روبرتو دوبليس وزير البيئة انه بحلول نهاية العام الجاري نأمل ان تزرع سبعة مليون شجرة في 2008 لتمتص 111

طنا من ثاني اكسيد الكربون سنويا و تسعى كوستاريكا الى تقليص صافي انبعاثاتها من الكربون الى صفر وحددت لذلك تاريخا

مستهدفا هو2021

يعنى الموضوع كبير فعلا و ممكن ييجي علينا فعلا و هوة جى بالتأكيد و على فكرة ما زرعناش و اللا شجرة

أولا : ماينفعش نزرع لأن عندنا حركة معمار عملاقة فى طول البلاد و عرضها خاصة فى الاسكندرية و أسمنت و حديد و زلط

مغرق الدنيا فحنزرع فين

ثانيا : دة احنا بنقلل المساحات المزروعة أصلا و بنقول للفلاحين ما تزرعوش قمح و لا قصب عشان الارهابيين ما يستخبوش

فيها يبقى عايزنا نزرع فى المساحات الاسمنتية و الزلطية طب إزاى

ثالثا : إيه الرفاهية دى 5 مليون شجرة و اللا 10 مليون شجرة الشعب عايز ياكل و يشرب و يشتغل .. إنما الموت بالإنحباس

الحرارى دة حاجة بتاعة ربنا و إحنا راضيين بقضاؤه و قدره و اللا انتو معترضين على قضاء ربنا و العياذ بالله

رابعا : ما سمعناش عن الموت بالإنحباس الحرارى دة إحنا واخدين على الموت بالغرق بتاع العبارات و الموت بالحرق بتاع

المسارح و الموت فى حوادث القطارات و الطائرات و العربيات لكن الموت بالإنحباس دة و الله فكرة حلوة خلى الشعب يجربها

عشان مايبقاش نفسه فى حاجة

و إحنا حا نبذل كل طاقتنا اننا نوفرهاله مجانا عشان محدش يكلف نفسه و آدى الفاتحة مقدما

مرحاض سعيد ... حياة سعيدة

كان دة شعار اليوم العالمي للمراحيض والذي أقيم في بانكوك بتايلاند في 2006 وقد حدد هذا اليوم من قبل

" المنظمة العالمية للمراحيض" والتي أنشئت في سنغافورة عام 2001 وضمت ما يقرب من 17 منظمة حول العالم من روسيا

وأمريكا مرورًا بأستراليا واليابان، وتهدف إلى تحسين وضع المراحيض عالميا والتوعية بالعادات والسلوكيات الصحية السليمة

قدم في هذا المؤتمر ما يقرب من 25 بحثًا خلال يومين، وشارك فيه ما يقرب من 450 مشاركا مفوضين من 50 منظمة من

المنظمات الحكومية وغير الحكومية قادمة من أمريكا، وإنجلترا، والنرويج، وأستراليا، وألمانيا، والهند، وهونج كونج، وإندونيسيا،

والصين، وتايلاند، وسنغافورة، وجنوب إفريقيا، وماليزيا، وبنجلاديش

والجدير بالذكر أن هناك أيضا كلية دولية للمراحيض افتتحت عام 2005 من قبل المنظمة؛ وذلك للاهتمام بالتصميم والنظافة

والصيانة الخاصة بالمراحيض، وهي تقدم برامج تدريبية مفصلة عن التصميمات والصحة البيئية وجميع ما يخص المراحيض

أطلقت منظمة أوكسفام الخيرية في المملكة المتحدة حملة من أجل اقناع البريطانيين بإرسال 26 ألف مرحاض إلي 49 من دول

العالم الثالث كهدايا بمناسبة عيد الميلاد لهذا العام. وتهدف الحملة إلى منع انتشار الامراض المعدية مثل الكوليرا والتيفوئيد بسبب

الخلل الكبير في عمل شبكات الصرف الصحي

إيه اللى بيحصل دة يا جماعة حتى الكابينهات ليها منظمة دولية و دول و مؤتمرات و توصيات على فكرة الدول العربية مش مشتركة

فى المؤتمر دة و لا مشتركة فى المنظمة دى من أصله لان الشوارع كلها كابينيه كبير تحت الكبارى و على الحوائط و على البيبان

المقفولة و حتى لما حاولنا ننظم الموضوع شوية عملنا حمامات بس بفلوس فزودنا كابينيهات الشوارع و بقينا ان من مشاريع أعضاء

مجلس الشعب و المجالس المحلية و يخطبوا فيها فى الناس ان من أهم انجازاتنا لما ننجح اننا نعمل مباول و حمامات عامة بالذمة دة

كلام ناس عاقلة فى القرن العشرين أقصد القرن الواحد و عشرين

و لما دعبست عن سبب الموضوع دة ليه الحكومة سايباه من غير حل عارفين كانت الإجابة إيه إننا مش عايزين نقيد حرية المواطن

بتاعنا و نجبره إنه يقضى حاجته فى مكان معين لكن لازم نديله حريته إنه يعمل مطرح ماهوة عايز ... انتوا مش بتقولوا الحرية

الحرية طب آدى الحرية ... برضه مش عاجبكم

دة احنا كمان بنفكر نخلى أماكن خاصة فى الفضاء للستات لأن الرجالة واخدة حقها فى الموضوع دة لكن الستات لأ ... و إحنا ماضيين

على إتفاقيات و توصيات فى مؤتمر المرأة أنها زى الراجل تمام ... و إذا كان الراجل بيعمل اللى هوة عايزة فى الشارع يبقى لازما

الست تعمل زيه تمام ... شهر و اللا حاجة و نقر الكلام دة فى الحكومة و نختار الأماكن و الحارات و يبقى كله تمام

و سلم لى على منظمة التواليتات

حتى لعب الأطفال يا عالم !!!

بنظرة على أرقام إحصائيات اللى أُعلنت ضمن فعاليات المؤتمر العلمي السنوي لكلية رياض الأطفال لقينا الآتى :

متوسط اللعب التي يستمتع به الطفل الواحد في سن 6 سنوات في الدانمارك يبلغ 500 لعبة داخل المنزل .. أمال خارج البيت

كام !!! و تصدر تايوان لعب أطفال لأنحاء العالم بما قيمته مليار دولار

و فى اليابان 10% يبلغ سوق الإستهلاك الأمريكي للعب من سوق الاستهلاك العالمي 36 %

أما باقي دول العالم بما فيها دول أمريكا اللاتينية وأفريقيا 35% و فى دول آسيا (عدا اليابان والدول العربية الآسيوية) 13 %

أي أن الدول العربية تستهلك 6 %

ذلك بالرغم أن الأطفال العرب يشكلون ما يزيد عن 140 مليون نسمة هم نصف القاعدة السكانية للوطن العربي، في المقابل نجد

إسرائيل برغم تعداد سكانها الضئيل قياسًا للعرب تهتم بصناعة لعب الأطفال وتجتهد في هذا المجال؛ عشان تكون مركز الصدارة في

منطقة الشرق الأوسط، مستهدفة في ذلك المنطقة العربية، كي تغزوها بتلك الآلية "الخطيرة" المؤثرة في عقول وأفئدة الأطفال العرب

فنشطت فيها صناعة لعب الأطفال، دون منافسة أو خوف من خطر منافسة متوقعة حتى الآن ومعتمدة على مراكز بحوث لتفنين

وتصميم أشكال ومضامين ما يتصل بصورة مباشرة ومؤثرة بصياغة عقول وأفئدة الأجيال العربية الجديدة

يمكننا أن نشير إلى أن ألمانيا قد نهضت باقتصادها عقب الحرب العالمية الثانية على أكتاف صناعة لعب الأطفال، ثم انطلقت منها إلى

الصناعات الإليكترونية المعقدة و التى غزت بها العالم كله

والسوق العربية تعنى أسواق اثنين وعشرين دولة عربية تضم 300 مليون نسمة، وهي أسواق متعطشة لمثل هذا المنتج وتشتد

الحاجة إليه، نظرًا لاشتراك الدول العربية في الخصائص الثقافية والفكرية والحضارية واللغوية والبيئية الواحدة

ياعم لعب أطفال إيه و كلام فاضى إيه إحنا عندنا أزمة كبيرة فى كل حاجة ... أكل بالضرب و الشرب بالضرب و اللبس بالضرب

و الفسح بالضرب و الطلوع بالضرب و النزول بالضرب و تقوللى لعب أطفال

طبعا تخلف لأن اللعبة دى بتشكل عقل العيل و بتحدد طريقة تفكيره و بتحدد شخصيته و بتحدد ميوله المستقبلية و بتكشف مواهبه

الذهنية و بتقولك البلد فى الآخر رايحة فين من طريقة تربية عيالها

أنا ملاحظ ان كل حاجة مالهاش لازمة و مش مهمة و مش دلوقتى و إحنا فى مرحلة صعبة و فى مرحلة حرجة و فى مفترق طرق

و فى مرحلة دقيقة يعنى مش مكفيكم كل السنين دى بتعملوا فيها إيه حرام عليكم

أبو الهول أفندى

يبدو أن ظاهرة صمت الأزواج أصبحت شبه عالمية ؛ ففي تقرير لمجلة "بونته" الألمانية توضح الإحصائيات أن تسعة من كل عشر

سيدات يعانين من صمت الأزواج، وانعدام المشاعر بين الأزواج المرتبطين منذ أكثر من خمس سنوات. وتشير الأرقام إلى أن 79%

من حالات الإنفصال تكون بسبب معاناة المرأة من انعدام المشاعر، وعدم تعبير الزوج عن عواطفه لها ، وعدم وجود حوار يربط بينهم

طبعا الإحصائية دى ألمانى يعنى بيتكلموا عن الناس اللى عندهم بس أنا حاسس كأنهم بيتكلموا عن الناس اللى فى الوطن العربى

و يظهر ان المشكلة دى بقت عالمية... لكن اللافت إن ليه مفيش كلام بين الزوجين و همة اللى ما كانوش بيبطلوا كلام أيام الخطوبة و

أيام كتب الكتاب و كمان أوائل حياتهم الزوجية ... عارفين الحل إيه من وجهة نظرى الضعيفة إنهم يرجعوا فعلا لأيام زمان يعنى

نلبس لبس الخطوبة و نلبس لبس الزفاف و نحكى فى الحكايات بتاعة زمان يعنى ممكن نسرب الولاد عند تيتا أو طنط أو عمو أو أبلة

و نخرج لوحدنا حاطين إيدينا فى إيد بعض محدش عايز مننا حاجة و نروح على الكورنيش أو الجنينة و هات يا درة و جيلاتى و

سودانى و لب أن واثق أن دة حيبقى مفيد لعلاج ظاهرة أبو الهول

أنا عارف إن الهم وحش والدين هم و المشاكل هم .. لكن مش حا نعيش حياتنا كلها نكد وغم ... لو كان لازم أزعل أزعل على أد

المشكلة و فى وقت المشكلة بس يعنى عندى بكرة مشكلة لازم أزعل طبعا لكن بكرة مش النهاردة و لما ييجي بكرة أبقى أزعل و بعد

بكرة مفيش زعل عارفين إحنا ما بنعرفش نزعل و كمان ما بنعرفش نفرح ... زعلنا وحش و فرحنا برضه وحش عارفين لما بيعمله

الكاميرا الخفية فى بلاد برة بياخدوا الموضوع ببساطة و هات يا ضحك و فرحة و زأططة و فرفشة لكن فى الوطن العربى عايزين

نقطعه و نكسر الكاميرا و نجرى ورا الراجل فى مشهد مأسوى بايخ

و أنت يا زوج يجرى إيه لو وأنت راجع البيت مكلدم تحود على بتاع الورد ... بلاش على بتاع الشيكولاته ... بلاش على بتاع الطوفى و

المستيكة و الله حا تعمل أثر كويس جدا و سلام بقى على حضن خفيف و بوسة سريعة و ابقى قوللى على النتيجة

و انتى يا زوجة إحكيله المشاكل لما ياكل و يستريح شوية و انتوا بتشربوا الشاى فى البلكونة و اللا فى الصالة و اللا فوق السطوح

و الله حاتفرق جدا و ياسلام لما تساعديه فى قلع هدومه و جيبيله البيجامة و اللا الترينج و اللا القفطان و اللا الروب و قوللى على

النتيجة

أخيرا إحنا الأول هيييييييييييه

كشف استطلاع للرأي اجرته مؤسسة »بيبول« الامريكية ان المصريين أكثر شعوب العالم كراهية لحكومتهم .أجاب 13% فقط ممن

شملهم الاستطلاع بـ »نعم« في سؤال هل انت راض من اداء حكومتك؟.

و اكد الاستطلاع الذي اجري في 47 دولة ونشرت نتائجه علي موقع المؤسسة الالكتروني ان الشعب الكويتي في مقدمة الشعوب

العربية الاكثر رضا عن حكومته. اكد 79% من الكويتيين انهم راضون عن حكومتهم يليهم اللبنانيون بنسبة 61%

والفلسطينيون 52% والمغاربة 47% والاردنيون 45% والاسرائيليون 23%

واظهر الاستطلاع ان الفلسطينيين يليهم المصريون هم اكثر الشعوب تشاؤما بين دول المنطقة العربية بشأن اطفالهم، حيث قال 24%

من الفلسطينيين و43% من المصريين ان مستقبل ابنائهم سيكون اسوأ حالا

واشار الاستطلاع الي ان مصر هي ثاني دول العالم من حيث شعور سكانها بالامان حيث يشعر بالخوف 16% فقط من جملة من

شملهم الاستطلاع وتأتي في المرتبة الاولي فلسطين حيث يشعر 8% فقط من سكانها بالخوف. في حين جاءت الكويت ثاني دول العالم

بعد اسرائيل قلقا وخوفا من ايران

الرضا عن الحكومة الرشيدة مش مهم لأن الحكومة بتقول عن نفسها إنها ممكن تعملك كل الحاجات اللى فى نفسك و ما تكونش

راضى عنى زى الإبن الجاحد اللى امه أو أبوه بيقطعوا نفسهم عشانه و هوة مصر إنهم مستقصدينه و ما بيحبهوش و بيفضلوا أخوه

التانى عليه و زى الزوجة اللى دايما مقطعه فروة جوزها و محملاه كل مشاكل العالم التالت و الرابع و الخامس و هوة يا حرام

مظلوم دايما و عامل زى البغل و اللا الحمار اللى دايما بيلف على لقمة عيشه هوة و مراته و عياله .... يعنى مش مهم ترضى عنى !!

برضه الحكومة مش مصدقة اننا أكثر الشعوب فى العالم تشاؤما بالنسبة لولادنا و بيقول الموضوع فيه جوانب إيجابية كتير يعنى

الإستطلاع قال ولادكم بس.. يعنى حاجة واحدة بس .. لكن فيه حاجات كتير تانية كويسة و نقسم بالله العلى العظيم ان ولادكم في عين

حفيدى ننوس ابن ابنى جمال و فى عيون ممدوح اسماعيل و فى عيون أحمد عز و فى عيون صفوت الشريف و كمال الشاذلى

حتى بالامارة إن الأستطلاع قال اننا اكتر شعب نشعر بالأمان فى العالم ليه !!؟؟ لان كل حاجة مستقرة و كل الأمور مستتبة و كل شئ

تمام ودة اللى مخلى الناس شاعرة بالأمان و احنا بنوعدكم اننا ننمى الشعور دة عندكم بأننا نحسسكم أكتر بالإستقرار و محدش يسأل

عن إخوانا الفلسطينيين انهم رغم اللى همة فيه و حاسين بالأمان قبلنا لأن دة شأن داخلى و كل واحد يخليه فى حاله

و طول ما فيه نفس طالع و داخل يبقى و الله العظيم حادى لغاية الجوزة ما تخلص

بتشجع عصابة مين

تشير إحصاءات صادرة عن جمعية التجارة الإيطالية إلى أن عصابات المافيا أصبحت تسيطر على عشرين بالمئة من القطاع الخاص

الإيطالي. وقد أعلن ذلك في مؤتمر تعقده الجمعية في مدينة ميلانو

وذكرت الإحصاءات أن إيرادات عصابات المافيا الإيطالية تبلغ نحو مئة وثلاثة وثلاثين مليار دولار سنويا، أي ما يعادل خمسة عشر

بالمئة من الناتج القومي الإجمالي وذكرت وثيقة صدرت عن المؤتمر أن أنشطة التزوير أصبحت تشكل جانبا كبيرا من الناتج الصناعي

في إيطاليا وأشارت الوثيقة إلى أن إيطاليا أصبحت تحتل الآن المرتبة الخامسة بين أكثر دول العالم إنتاجا للسلع ذات العلامات

التجارية المزورة بعد تايوان وكوريا الجنوبية وتايلاند والصين وأوضحت أن عصابات المافيا تستثمر أرباح أنشطتها في شراء

العقارات والمستشفيات الخاصة ودور التقاعد ومتاجر السوبرماركت والفنادق والمطاعم وذكرت أن ثروات عصابات المافيا تكفي

لسداد الديون العامة لجميع بلدان أوروبا

اولا ربنا يزيدهم من نعيمه و بلاش احنا

ثانيا و الله عصابة محترمة انها تستثمر فى بلادها بالشكل دة و بالشفافية دى و بحجم الفلوس العملاق دة طب دى عصابة و عاملة كل

دة الدور و الباقى على حكوماتنا العربية اللى مابتعملش حاجة و ما بتعلنش عن حاجة و مش عايزة تعمل حاجة و زى مايكون بينها

و بيننا تار بايت من فضلكم يا حكوماتنا خليكم زى عصابات المافيا

انا عارف وجهة نظركم كويس و كمان مقدرها انتم عايزين تعملوا عصابات صغيرة متخصصة كل عصابة ليها حاجة دى للحديد و دى

للاسمنت و دى للزيت و دى للحج و دى للسكر و دى للدقيق و كل عصابة تعلن ميزانيتها و مصروفاتها و أرباحها بكل شفافية

و عارف كمان قصدكم و انتم طبعا دارسين إدارة و تخطيط مش عايزين تحطوا كل المقدرات فى إيد عصابة واحدة زى المافيا

عايزين توزعوا الشغل على الجميع عشانت ما يكونش فيه احتكار و الله فكرة عبقرية

و كل عصابة بسم الله ماشاء الله عاملة فروع فى كل محافظة و مديرية و قرية و مركز عشان تربى كوادر شابة عشان تشب على

خدمة الجماهير و احنا كمان نشب على حب العصابة دى من صغرنا

و كمان العصابة اللى نعرفها أحسن ميت مرة من العصابة اللى ما نعرفهاش

يابلاش

توقع مهندسو مشروع جلاكتك سوت أول فندق فضائى أن يبدأ عمل هذا الفندق في عام 2012 حيث سيسمح لضيوفه بالسفر حول

العالم في 80 دقيقة ونقلت رويترز عن مهندسى المشروع في برشلونة قولهم أن الفندق سيكون الأغلى في المجرة وأن تكلفة

الإقامة لمدة ثلاثة أيام تبلغ أربعة ملايين دولار.وأضاف المهندسون أنه خلال هذه المدة سيرى الضيوف الشمس تشرق 15 مرة في

اليوم وسيرتدون سترات مجهزة تمكنهم من الإلتصاق بحوائط حجراتهم مثل الرجل العنكبوت وبدأ فندق جلاكتك سوت كهواية لمهندس

الطيران السابق كلارامونت حتى قرر احد الشغوفين بالفضاء جعل الخيال العلمى واقعا بتوفير ثلاثة المليارات دولار المطلوبة

لبناء الفندق

أنا شايف إن 3 أيام بأربعة مليون دولار سعر كويس جدا بس المشكلة أنو بالدولار مش بالمصرى و انتوا عارفين انه من الصعب انك

تلاقى عملة صعبة اليومين دول بس لو كانوا خلوها بالاسترلينى أو اليورو كان لية سكة لكن الدولار ماليش سكة معاه خالص

و بعدين فعلا إنك تشوف الشمس بتشرق 15 مرة فى اليوم دى بصراحة تستاهل ال كام مليون دولار دوكهومة ياعم دة كل ما الشمس

تطلع كل يوم ببقى ناعى هم الفطار و المدارس و المواصلات و المصروف و طلبات المدام و المدير الرزل اللى مستنينى فى الشغل

و ببقى ناعى هم العراك و الشتيمة اللى باسمعها فى كل حتة و انا ماشى فى سكتى و ببقى ناعى هم طابور العيش و طابور التذاكر

و طابور السينما و المسرح و طابور كل حاجة تخيل انى اعمل دة 15 مرة كل طلعة شمس !!! خصوصا انى عرفت ان ال 4 مليون

دولار دول من غير الفطار

و بعدين فى ميزة فى أنه يخليك لازء فى الحيطة زى عمنا الراجل العنكبوت يعنى مش حتتحرك كتير و لا تروح هنا و هنا لازء فى

الفندق ... يعنى لا فيه فطار و لا مصروف و لا طوابير و لا أى حاجة عمال تنط و تطير و لا على بالك حاجة من الحاجات الغريبة

دية على فكرة عندى واحد صاحبى متعرفهوش ممكن يخلى المبلغ 3 مليون و 900 ألف دولار بسي تمشى معاكم دى

عموما خلوا تليفونى عندكم يمكن تشاوروا عقلكم زيرو مليار مليونين 900 ألف