إشمعنى الحضرى يا ريس

طالعتنا وسائل الإعلام المختلفة بتدخل الرئيس مبارك و إعطاؤه توجيهاته لإتحاد الكرة لحل أزمة الحضرى لاعب النادى الأهلى و منتخب مصر و السماح له بالإحتراف الخارجى و لنا عدة ملاحظات :
1) هو مش فيه لوائح و قوانين و تقاليد تنظم الانتقالات فى الداخل و الخارج ياريس

2) كان مفروض أسمع منك ياريس إنك شديت ودنه لسفره بدون إذن ناديه و لأن رئيس وزرائك ملطوع مستنى عصام وهو بيرقص
و لكنه فوجىء به يركب الطيارة من جنب الإستاد اللى قاعد فيه و يسافر الى نادى مجهول فى سويسرا الشقيقة

3) المفروض كمان إن سيادتك تدى توجيهاتك السنية لأصحاب المخابز إنهم يرحموا الشعب الجعان و الفقير و يدوهم العيش الآدمى
اللى عايزينه و اللى فيه ناس من نفس جنسية الحضرى ماتوا وهمة بيحاولةا يحصلوا عليه

4) المفروض كمان إن سيادتك تدى توجيهاتك لصاحبك عادل لبيب برصف الرصفان و الطرق فى كل الاسكندرية

5) يا سلام لو سيادتك تدى توجيهاتك لبتوع المصانع و الاستثمارات بتشغيل البطالة المتلتلة اللى فى بلد سيادتك

6) المفروض كمان تدى توجيهات سيادتك لرجال مرورك بتنظيم المرور فى كل شوارع مصر المحروسة اللى بيقع فيها 7آلاف قتيل
سنويا و 25 ألف مصاب

7) كنت عايز سيادتك تعمل حاجة للأربعة مليون عانس اللى موجودات فى مصر

8) كنت أتمنى سيادتك تقول لا لغلو أسعار الزيت إلى 11 جنيه و الرز إلى 3.25 جنيه و الدقيق إالى 3.5 جنيه و العدس إلى 9 جنيه

9) زى ماسيادتك خايف على مصلحة الحضرى فيه برضه ولادك مرضى الفشل الكلوى واخواتك مرضى السرطان و ولاد خواتك
مرضى القلب و صحابك مرضى أنفلونزا الطيور

10) شعور سيادتك الأبوى على مصلحة أحد ولادك و هو الحضرى يشعر بقية ولادك بالغيرة على ضعف الأداء الاقتصادى و التعليمى
فنحن لسنا من ضمن أحسن 500 جامعة فى العالم و تفشى أمراض إجتماعية لم نشكو منها من قبل

ياريس .... نظرة و حياة أبوك